近年MBTI好受歡迎，不過我有個研究心理學嘅朋友指MBTI通過唔到validity test (效度測試) 同reliability test (信度測試)，所以佢認為唔太準。佢推薦一個叫VIA Character Strengths (VIA 個人性格強項測驗)嘅測試。佢話呢個測試喺科學上比較嚴謹。VIA以96條問題量度參與者24種性格強項，包括social intelligence (人際交往能力)、humour (幽默)、bravery (英勇)、honesty (正直)等等。最後，測試報告會將所有性格強項以1至24嚟排名。 根據我嘅VIA報告，我最強嘅係prudence (謹慎)，最弱嘅係 leadership (領導能力)。其實係架，我的確唔擅長做領袖。🤣 MBTI基本上將人分成16種人格類型，但VIA唔會噉分類，而係按照每個人嘅性格強項，每個人都會有好可能係獨一無二嘅排名表。 我鍾意VIA嘅地方係佢唔會過分解讀，而當中嘅性格面向有24個，唔會太簡單，亦唔會太複雜。我亦從中察覺到自己忽略咗嘅強項或者弱項。 至於MBTI，我覺得呢個係好有娛樂性嘅測試。MBTI有啲角色造型、memes同埋片我都幾鍾意。好多MBTI嘅posts會深入研究每個人格類型，有好多大膽分析。 舊年我做過HelloTalk嘅animal MBTI test，結果係ENTP，跟住系統自動更新埋我個profile，話我係ENTP，不過我完全唔認同自己係E人，好快就delete咗。我亦都做過16Personalities，呢個係更詳細嘅MBTI測試，結果係INTJ。感覺上呢個準少少。 我唔諗住判斷邊個測試好啲，亦唔期望任何一個測試可以又準又深入。呢啲測試採用嘅唔同方式同角度都好有趣，喺分析同描述性格方面有一定參考價值。如果有人做完測試，覺得測試結果同自己實際性格好吻合，我地真係可以透過測試結果進一步了解佢地。呢個情況下，呢啲工具就會好有價值。 (English version in previous post)