上星期六係我第一次去油麻地嘅登打士茶餐廳食嘢，餐廳老闆收養咗好多流浪貓，仲會幫佢地配對合適嘅領養者。 我專程嚟同貓貓見面，不過一開始佢地匿埋咗。侍應話佢地鍾意先會出嚟。大約半個鐘之後，貓店長茄子終於蒲頭，佢啲毛係黑白色。原本我地呢班食客各自傾計，但當茄子出嚟「巡視樓面」，大家都好歡迎佢，好似佢先係客人噉。 冇幾耐，另一個叫棉花糖嘅白色貓店長都過咗嚟「監察業務運作」，大家見到佢駐足喺牆上面嘅紙皮箱，都好同心噉同佢打招呼。突然間，棉花糖一下子跳去茄子到，跌落我張枱，再降落喺地面，差啲整瀉我啲嘢食同嘢飲。好多人嚇到叫咗聲「喎！」😂 同一般茶餐廳嘅價錢差唔多，但有得食仲有得玩貓，我覺得好抵。餐廳氣氛好好，顧客一齊同貓咪互動，令我有種同大家連結埋一齊嘅感覺。 可惜嘅係，登打士茶餐廳會喺今個月31號結業，我都係最近先知。🥲 近年嚟，多咗好多香港人北上旅遊，少咗人留港消費，加上貴租同兩餸飯成為新趨勢等等現象，都令茶餐廳生存困難。如果你都喺香港，我誠意推薦你喺呢間餐廳結業之前入去試下。 (Welcome to read the English version in my previous post. 😸)