Is There for Honest Poverty by Robert Burns.


Part 1 of 2. 

Is there for honesty poverty

That hings his head, an' a' that;

The coward slave - we pass him by,

We dare be poor for a' that!

For a' that, an' a' that,

Our toils obscure an' a' that,

The rank is but the guinea's stamp,

The man's the gowd for a' that.


What though on hamely fare we dine,

Wear hoddin grey, an' a' that?

Gie fools their silks, and knaves their wine,

A man's a man for a' that.

For a' that, an' a' that,

Their tinsel show, an' a' that,

The honest man, tho' e'er sae poor,

Is king o' men for a' that.


Ye see yon birkie ca'd a lord,

Wha struts, an' stares, an' a' that;

Tho' hundreds worship at his word,

He's but a coof for a' that.